Hril ding kan ton tikah

Cutikah  Abram in Lot hnenah, “Sungkhat kan si ih na minung pawl le ka minung pawl hi to-aw rero ding an si lo. Kan ṭhen-aw sawn pei. Na duhmi ram hril awla cutawkah feh aw. Kei hmun dangah ka feh pei,” a ti.

Seemtirnak 13 : 8 - 9

Falamite

Hril ding maktara cu Lot kut sungah a thleng ta. A sungsang, a milai pawl, a ṭilva pawl hrangih thupibik a si mi leiram, khurkhua, an nunnak ding, an hmailam tluan hrang -- hitluk ih thupi cu ziangdang a um nawn ding! Hih a hrilnak hin an nun hmailam tluan hrang ziangtluk sullam nei in a va thupi zik so! Khuale ram cu ralring tak le fimkhur takin a cuan, a hlethlai.

Abranham cu Lot ih a pu a si vekin a duhnak leiram pawl hmaisa sawn ah hril theinak thu a nei. Nan Abraham cu hril ding a ton tikah leiram cuan sawn lo in Pathian sawn a zoh.
Abramham zumnak cu hmuh theimi leiram ah si sawn lo in hmuh thei lo mi a Pathian sawn ah a si. Lot bangin a mit ih hmuh theimi hahioza thil pawl ah ṭhumawkin duh hrilnak a tuah lo. A rinsannak cu Pathian ah a ret ṭheh. Pathian cu lam i hruaitu lawng hman si lo in a duhnak lamzin zawh thei dingin thazang i pek, ke i kar pi ti fiang ten a zum.

Hril ding na ton tikah nang teh ziangmi ah si na ṭhumawk? Kan ralring a ṭul nasa ding. Kan mit in hip zettu thil pawl ih bum le thlemnak zoh in hmailam hrang thu kan ṭhencat pang maw? Lot cun leiram ṭha le tiva luannak hmun a hril, cule Sodom tla cu a vo a si ve cih. Abraham vekin hril ding kan ton tinten Pathian sawn zoh in a mah rinsan in a lamhruainak sawn ah kan nun ṭhum cio uh si.