Ngaidamnak

Francis Cung Bik

Bible Hril- Kolose 3:13 "Pakhat le pakhat karah thinlung hmuh-awk lonak le phunzainak a um ahcun pakhat le pakhat zawi-awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw ve uh."

Mai Far Men Par hla ih 'minung kan si ih mah te lawng kan um lo' a ti bangin minung ti cu pawlkom, kiang le kap thawn a um mi kan si. Cui pawlkom sung kan um tikah sualnak palhnak tete kan tuah ngah ṭheu. 'Lei le haa' an ti bangin milai le sual palhnak ti cu a ṭhen aw thei lo. Nan kan ṭulmi cu a tlun kan Bible bungcang kan hril mi bangin ngaidamnak hi a thupi zet. Sile Ngaidamnak hi thutlang dot thum in kan zoh hnik pei.

1. Ngaidamnak cu Khrih lungput a si

Luka 23:34 Jesuh in, “Ka pa, an sualnak run ngaithiam aw. Ziang kan tuah ti an thei lo,” tiah a ti. Hinah Jesuh in 'an' ti mi ṭongfang a hmang. Zo pawl ha a sawh duh. A dungthluntu pawl maw? Maw a mah a duhdawtu nubu ho pawl, thinglamtah tangih a ṭap rero tu pawl? A silo. Jesuh in a ral pawl, thi seh tiih a that rero tu pawl, a zur phiartu pawl, Rome ralkap pawl, Pharisee pawl hrangah thla a cam sak. Jesuh in ral duhdawt ding ti in zirh, cutiih a zirh vekin amah rori in a nun pi. "Ka zirh vekin um, ka um vekin um hlah" ti vek Saya a silo.

Kawhhran cu Jesuh ih ruangpum kan si, Kei le nang bulpak zumtu pawl tla kawhhran kan si. Jesuh ih ruangpum a si mi nang le kei Khrih lungthin a si mi ngaidamnak kan neih a ṭul.

2. Ngaidamnak in thlawsuah sangka a on

Mi pakhatkhat parah na thin a heng, a na dah maw? Cui thinnatnak pawl cu a rei vivo tikah thinlung damlonak a suuhpi thei. Lungtur natnak tla a suahpi thei.

Joseph ih nunnak mallai kan zohhnik pei. Joseph cu a uu le pawl in an zuar, that an tum, khur sungah an thlak, a phunphun in an zawmtai. A tawizawng in sim men sehla netabik ah Pharaoh inn ih thu neitu ah a rak cang.

Joseph in a uu le pawl ih a parih an tuahmi sualnak hmuahhmuah a ngaidam. Nitin a nunnak ah a uu pawl ih an tuahmi thinnatnak in a nun a kai hruai lo, Pathian thu sawn in a nun a kai hruai. Thinnatnak, ngaidam theilonak lawnglawng ruat ringring sehla Pharaoh inn ih mi thupi si dingin Pathian in lam a on lo ding.

3.Ngaidamnak in Thinnomnak a suah ter

Saam 51: 12 "Na runnak ihsin a rami thin-nomnak cu i pe sal awla, Ka thlarau cu na thu ngait siter hram aw." David Singpahrang Bawipa minu parah sualnak a tuah ngah. Zohman in in thei lo tiah a ruat. Nan, Bawipa hnen ihsin a ra mi Thinnom-nak, lungawinak cu a hlo ta riai. Saam 51 thutlangpi kan zoh a si le, Ngaidam dihnak ti a si. David Siangpahrang bawipa cu Pathian hnenah nasa takin sual ngaidam a dil. Sual ngaidamnak a ngah lawngah Lungawinak le Thinnomnak a ngah ding.

Bawipa Jesuh hnen in sual ngaidamnak kan co, cui kan co mi ngaidamnak cu mi hnen pe sin ding kan si. Mirang ṭong in ti sehla GET and GIVE.

A siartu nan zate tlun ah Pathian in thluasuah lo pe hram seh.