Pathian Biak

HmingLian

Sunlai ahcun a ra. Ziangah? Ziangah nunau dang vekin zanlam ninem ah a ra lo? Midang nunau pawl ton duh lo ih kian hai deuh a bang ko lo maw! An mi relsiat hi nisa tuar hnakin a sa deuh si men ding. Curuangah si sunlai ah a rat.

Asinan, tuini cu amah lawng a si lo. Mikhual pakhat hi tikhur kap ah a rak to, a ke a thluang, a mit a rak sing. A hmai cu nisa tuarnak ih thlan thawn a si. Nunaunu in a kiangkap cu a zoh ih zohman a hmu lo. A vun zoh sal cu tikhur kap ih to pa cu a rak meng ih nunaunu cu a rak zoh. Nunaunu cu a ṭih deuh ih khatlam a hoi.

Cu pa cu a ding ih nunau nu cu tidai a vun dil. Cu nu cun zum tuk lo in, “Nang cu Judah mi na siih kei cu Samaria mi ka si; Ziangtinso tidai in ding i dil?”(Jn 4:9). Nunau nu cu ralring deuh in a um. Mipa in zangfah dil deuh vekih an hun ṭong khi ziang an ti duhnak si ti cu a rak theithiam tuk mi si. An karlak ih dawnkhamtu hi a sang ko. Jesuh cun an pahnih dawnkhamtu tlakrawh(uk-khee) pakhat a sang bik mi cu a vun hlon.

“Pathian ih a lo pek mi laksawng hi ziang a si, tidai a lo diltu hi zo a si, ti thei cila amah sawn na dil dingih anih in nunnak tidai a lo pe ding nan!”(Jn4:10).

Thu zirh a si lo. Thu sim a si lo. Ram hla tak ihsin ra ih nun ra sim a si lo. Cu nui dunglam thurel tla a si lo. Cumipawl pakhat hman a si lo. A ngenmi a si. Amah zum dingih a ngenmi a si.

“Nangmah lo nautattu ding ka si lo ih lo bawmtu ding ka si ti thei aw la ka duh nan. Tuini hnakin thaisun ah ni a thlum sin ding ti thei aw la ka duh nan. Kei ka rak kengmi cu: kumkhawnunnak cem ti um lo, ṭahnak um lo, thinphannak um lo ti thei aw la ka duh nan. In thei awla ka duh nan.”

Nunaunu cun nuam tete cun a zum phah vivo…

Nisa cu a vung niam deuh vivo. Cu nu cu a bel cu a ak(pom) lai. Jesuh cun nunaunu in a ṭong a sawn sal ding cu a rak hngak ringring. “Sikhalsehla ka pek dingmi tidai a intu cu a ti a hal nawn lo ding. Ka pek dingmi tidai cu amah sungah cirhti ah a cang dingih cumi cun nunnak tidai leh kumkhaw nunnak a pek ding.”(Jn 4:14)

Cunu cu a khualtlawnnak hi ramro ramcar a si. A hmai khal a kir thluh. A mit in thil a hawl, cemtheilo mi harsatnak thawn. Cirhti hmuahhmuah meiling mihut mi bangin. Duhdawtnak voi nga neih ṭul. Voi nga, duhdawtnak hrangih vansia. Hi nunaunu hi a ti a rak hal nak a rei tuk zo.

“Bawipa, cuih tidai cu i pe aw! Cuticun ka ti a haal nawn lo ding”(Jn 4:15).

Tu cu nunaunu in tlakrawh(uk-khee) pakhat a hlon. A zumlonak a tum lai ko. Vun lungkim cu a duh ko nan, a ngamlonak a tum lai.

Jesuh cu a um kel te in a si ko. Tlakrawh pakhat a taang lai. Dawnkhamtu pakhat a um lai. Sayapa cun ṭawnṭem awmi hmuahhmuah phelh dingin a sawm. “Na pasal va ko awla ra sal aw.”(Jn 4:16).

Cui ṭongkam ruangah a thin a phang. Ka pasal? Ka pasal! Ka pasal thu cu ka rel paih lo. Tidai thu kha in sim aw. Kumkhaw nunnak. Ka nunnak sungih harsatnak ka tonmi pawl siar lo rel ko aw.

Cu nu cun Judah pa ih mit cu a vun zoh cu midanglam ti a hmu.  Hi pa hi midanglam a si. Judah dang pawl vekin in biak lo. Mipa dang pawl vekin in zoh lo. Cu nu cun an thuhla cu a duh le a ti danglam thei. A duh le thusuhmi cu ngaihsak lo in a um thei. A duh le thuphan a rel thei. Amai thuthu si. Asinan, hi pawl cu tuah a tum lo hmang. Curuangah a netabik tlawkrawh cu a vun hlon.
“Pasal ka nei lo”(Jn 4:17).

Jesuh ih a letmi hi nuam ten vun siar aw. “Pasal panga na nei zo ih a tu ih na umpi mi pa hi na pasal ngaingai a si lo. Thudik i sim a si.”(Jn 4:18)

Cumi si Jesuh in a hawl mi cu. Thu hman kan simmi si a duhmi. Kan thupawk ringringnak ihsin ra suak ding si a duhmi. Jesuh Khrih thawi tonawk cu zanlai ih hmaikhuhnak khuhpi thawi ton awk vek si. Hmaikhuh mi on a cu zo.

Cunu khal a hmai cu a ong. Dawnkhamtu khal an hlon hlo zo. A thinlung sungih a aihramnakpi thawn cu a zum zo. “Bawipa, Prophet nasi ti ka lo thei. Kan nih Samaria mi kan pupa pawl cun hi tlang parah hin Pathian an rak biak; sikhalsehla nan nih Judah mi cun Pathian cu Jerusalem ah biak ding a si, nan ti.”(Jn 4:19-20)

Nunaunu ih thusuhmi hi hrilhfiah sual pang hlah aw.

Jesuh hi a kian lo; Jesuh kha a sawm sawn. A thu a thup lo; a si daan a rel awk thluh. A nunnak lungkua bangih thim zet sung tiang a fehpi vivo ih meifar na nei maw tiah a sut sawn mi si.

Ka khuitawk si a na ti ka lo sim hram pei. Zanlai ah ziang in si in ṭhang ti ka lo sim duh. Mi in in hnawl ti tla a si lo. Keimah te lawng ka si. Pasal lo in ka um thei ko. Ka um thei lo mi cu, Pathian hi khuiah a um ti ka thei lo hi si. Pathian khuiah a um ti in sim thei pei maw?

Tuarharnak pawl in thusuhnak an suah pi. Sychar khua ih tikhur daihnem hnuaiah Pathian in mi ih hnawl mi nunaunui hnenah “Pathian biak daan” timi thuthup a sim fiang.

Pathian biak hi a hmun le hma ah danglamnak a nei lo timi caan a ra thleng zo, ti Jesuh in a sim. A hmun le a caan hi a thupi nawn lo timi caan a thleng zo. A thupi mi cu thinlung si.

Nunaunu in cu mi a theih tikah a hni. Jesuh in ziang a sim duh ti a thei ih Jesuh hnenah, “Messiah cu a ra zo ti ka thei. Messiah cu a rat tikah cun ziang hmuahhmuah a mah in in sim leh ding.”(Jn 4:25).
Himi caan te cu thil maksak a si.

Piano tum thiam Handel in “Messiah” ti mi hla a tum mi vek a si.
Messiah in Messiah hawl tu a hawl, ti mi vek si.

Himi cu Pathian Biak(worship) timi cu a si. A rilrawng zetmi thinlung in a pai tuahmi puaipi a va tong vek khi a si. Mihlo mangbang vak rero in a pa a va tong vek khi a si. Ramro lakih vak rero in a pai inn a va tong vek khi si. Cucu Pathian Biak cu a si.