Good Friday

Anthony Bawi Lian Thang

Good Friday hi tlawngkai ninga ni a si ti kan Bible sungah fiangten kan hmu thei ( John 19:31). Jesuh thinglamtah tlun ih an thah ni hi tlawngkai ninga ni a rak si. Himi ni a ra suahnak cu mi tampi in ti le rawl ei lo in Jesuh Khrih ih thihnak zuntuar in ninga nitin rawlulhnak (Fasting) an rak neihnak in ra suakmi a si. Good Friday kan timi cu minung pawl kan sualnak ruangah a thi zomi nang le kei rundam kan si thei saalnak ding, Jesuh Khrih thinglamtah tlunah kan hrangah a nunnak pek in a thi a si ti hngilhlonak ding hrangih tuahmi ni a si.

Good Friday timi hmin hi ziangtin a ra suak ti  zohman in felfaiten an thei thei lo. Asinan mifim tampi in an zummi pakhat cu “Good timi cu” God’s timi ṭongfang hi an rak ngan laiah an ngan sual si ding ti hi an zumbikmi  a si. God timi ngansualnak in a rami a si an ti. Asullam taktak cu Good Friday si lo in “ God’s Friday” (Pathian ih Ninga Ni) ti duhnak  a si tin an ruat. Cun a dang ruahnak pakhat a um saal lala mi cu, “thinglamtah tlun ih Jesuh ih thihnak, a tuarnak thawng in sual ngaithiamnak kan comi rundamnak laksawng sunglawi le ṭha” timi sullam nei in a rami a si. An sim duhnak cu a ṭhami (Good) tinak in a ra tin ruahnak an nei.

Anglo-Saxon pawl cun “Good Friday” tin an ko ve. Cun France, Spain le Italy pawl cun “Holy Friday” tin an ko. Cun Eastern Churches pawl cun “the Great Friday"  tin an ko. Good Friday an rak hman hmaisabik nak cu, kum zabi 4 laiih Jerusalem ih an rak hmanmi kha a hmaisabik a rak si an ti. Good Friday hmaisabik an rak tuah lai ahcun  Nazi 3 sung, sun nazi 12 in zanlam nazi 3 tiang himi caan sung te hi thupibik in an rak hmang. “Sun nazi hleihnih hrawng in cuih ram pumpuluk ah zamlam nazi pathum tiang thimkhawzing a tlung”( luke 23 : 44). Martin cun zing khuavan hlanah thlacamnak thawn can a rak hmang ve. Himi Good Friday an khawmawk caan ih an thutlangtar le an sim tambikmi cu  Jesuh Khrih a thih hlante  thinglamtah tlun ih a ṭongmi ṭongkam pasarih (The seven last words of Christ ) hi a si.

Egypt pawl khal cun himi Good Friday ah hin thinglamtah zuk vek a simi sangreu (hmuk) in ei khawmnak an rak nei. Thlanglam American pawl in thuanthu an rak nei ve mi cu “Dogwood” timi thingkung hi a sangbik le a ṭhabik a si ruangah thinglamtah tuahnak ah rak hmanmi a si an rak ti. Jesuh in, “keimah ka tuarnak ruangah zaangfahnak le sirnak na neih ruangah tuihnu cu thinglamtah tuah awk tlakin va tum in va ṭha nawn hlah aw” tiah a sim, cui a sim hnu cun cumi thingkung cu tum thei nawn lo in a fate vivo. Cun himi thingkung hi , a ngreh awk ih thisen vekin kutneh a um cun  a par laifang ah hlinglukhum vek a nei tin an ti. Curuangah tu ahcun thinglamtah tuahnak ding ahcun a tlak nawn lo ti a si.

Jesuh Khrih hrangah cun hih ni hi cu kan hrangah ruah awk ṭha lo in a tuarnak caan le a mithli tlak caan a si, nan, unau nang le kei hrangah cun himi ni hi kan lungawinak bik ni, ni sunglawi  a si, sualnak in kan luat ni a si, curuangah hih ni ah lungawi in, in rundamtu cu thangṭhat in sunlawih in napin au cio ko uh si law …

Kan hrangah a sunglawibik le a lungawi um bik ni …

Aw … aw … aw

Good Friday…