Nitin Pathian thawn (Ziang hmuahhmuah neitu)

Lalruatcawk

1Korin 3:18-23

Paul in mah le mah bum aw lo dingin Korin zumtu pawl cu ralrinnak a pe. Cui mah le mah bum aw a timi tla cu an mah ten fimzet ih a ruat awtu pawl kha an si. Ziangahtile minung fimnak cu Pathian hmai ah aatnak a si. Pathian cun mifim ti aw pawl ih thuruahnak khal a thei thluh ih an ruahnak pawl khal zianghman lo men an si. Sikhalsehla Pathian hmaiah fim a duhtu cun a mah le mah mi aa ah cang hmaisa sawn seh.

Korin khua zumtu pawl lakah Paul a si lole Apollos ih dungthluntu ka si titu an um ruangah nasa takin ṭhenṭhek awknak a thleng ti cu kan theih cia mi a si. Curuangah Paul in minung ih fimawkternak cu Pathian hmai ah aatnak a si ruangah minung ih fimnak ah hngalhngawg le uar ding tlak a um lo tiah a ti. Zozo an si khal le thih ah maw nun ah maw, tu ah maw, a ralai ding caan ah maw, Paul siseh Appolos siseh an mai ta thotho a si. Ziangruagahtile Kawhhran timi cu Khrih ih ta a si vekin, Khrih cu Pathian ta a si.

Paul in Korin zumtu pawl hnenih nunsimnak le thazang peknak thu kan zoh asile, zumtu bulpak, Kawhhran, Khrih le Pa Pathian ih pehzom awknak kan hmu thei. Zumtu cu a mah bulpak ah Pathian Thiangthlarau umnak Pathian biakinn men lawng a si lo. Cui Pathian biakinn sinak cu bulpak dinhmun ihsin, Miburpi ih Pathian biakinn sinak, Khrih ih taksa le cui Khrih cu Pathian ih ta a sizia kan zir thei. Cuvek thinlung kan kawhran sungih kan neih asile thleidannak timi kan lakah a um lo ding. Culawng si lo in, zozo khal kan pawlpi sungah dinhmun le covo an nei thluh ding a si.