Nitin Pathian thawn (Pathian Biakinn)

Lalruatcawk

1Korin 3:16-17

Nannih cu Pathian biakinn nan si ih a Thlarau nan sungih a um kha nan thei lo maw? Curuangah zokhal hih Pathian biakinn a siatsuahtu cu Pathian in a siatsuah ve ding. Ziangahtile Pathian biakinn cu a thianghlim ih a biakinn cu nanmah hi nan si.

Cathianghlim ih sim vekin kannih zumtu pawl cu Pathian biakinn kan si. Cui Pathian biakinn sung ahcun Pathian thlarau a um. Pathian biakinn kan sinak hi Paul ih ngandaan thlunin kan siar asile zumtu bulpak nunnak lawng a sim duhmi a si lo ti kan hmu fiang.

Ephesa 4:13 ih kan hmuh vekin zumtu Pathian faate a simi hmuahhmuah in Thiang Thlarau hminsinnak kan co. Sikhalsehla cui Thiang Thlarau kan co fingfing mi cu pumkhat a si. Pathian faate hrangah Laipa/nu ih comi le Vairangpa/nu ih comi thlarau a bang aw.

Cuti a si ruangah zozo khal cui Pathian biakinn, zumtu pumkhat kan sinak a siatsuahtu cu Pathian khal in a siatsuah ve ding. Siatsuah timi ṭongfang hi Cathianghlim in felfai le fiangzet in a rel lo nan Pathian hrangih kan ṭuanbangnak hmuahhmuah man nei lo ih canter thluhnak a si. Curuangah kannih zumtu pawl cu Pathian in a mai cennak hrang rori ih thianhlimtermi Pathian biakinn kan si. Bulpak sinak in Pathian biakinn ka si men lawng si lo, zumtu burpi ih Pathian Biakinn thianghlim sinak hi Pathian duhdaan a si.