Thu Relcatnak

Dave Branon

Siar:   :1 Korin 9:1-6

Cuih thu ahcun Paul le Barnabas cu napi in an el aw ih an ṭhen aw. Barnabas in Mark cu a hruai ih Saipras ah long in an feh. Tirh.15:39

1884 kum May thla ah John le Martha cu an fapa nau thar hminsak dingah hminlai (middle name) hrang ding an duh daan a bang aw lo. A nu in “Solomon” sak a duh ih a pa in “Shippe” sak a duh. An innsang sungkua hmin (family name) a si veve. Curuangah an duhmi ṭhum aw veve in an innsang pahnih ih hmin cafang a telmi “S” an sak. Cuti cun Harry S. Truman cu US President lakah hmin laita cafang pakhat lawng neitu a si.

Kum 120 lai a rung luan hnu lawngah John le Martha teih nupa ih hminsak ding an duh daan bang awk lonak thu kan run thei lai a si cu. Asinan sullam neizet in thu relcatnak an run neih khal kan thei.

Thukam Thar ah missionary pahnih Paul le Barnabas karlak ih lungkim tlang thei lonak thu kan siar (Tirh. 15). Barnabas in an khualthawnnak ah Mark hruai a duh (c. 37). Asinan Paul cun ahlan thuhla ruangah hruai a duh lo (c. 38). Curuangah nasazet in thu an el aw ih a dangdang ah ṭhen aw in an feh (c. 39).

Kum 2000 lenglo a rei hnu khalah Paul le Barnabas ih thu el awknak cu kan run siar lai. Asinan kumkhua in an pehtlaih awknak hri a siat lanta lo ti a fiang. Paul in Barnabas thawn rem awk saalnak a tuah. Paul in a nunnak netabik caan ah Mark khal a hnenih um dingin a ko ti kan hmu. “Hnaṭuannak ah i bawm theitu a si ding,” (2 Tim. 4:11) a ti.

Thu el awknak ti cu a um thei ṭheu. Asinan thu relcat theih saal a si. Mi iksiknak cu a ritzetmi phurrit a si.     

Thu el awknak cun huat awknak a suahter thei,

Taansan le napi ih lungkim lonak a thlenter;

Asinan thu relcatnak kan neih ahcun,

Kan pawlkomnak a fen hlo lanta lo ding.

Mi huat neih hi tuamhlawm ṭhat saal harzetmi a si.

Hminsin:     :Rev. Run Cung Mang ih thlahmi nitin thlarau rawl sung ta a si.