Thil Fate pawl

Joe Stowell

Johan 6:4-14

Hitawk ahhin nauhak pakhat a um ih barli sang hlom nga le nga pum hnih a nei. Asinan minung hizat hrang ahcun zianghman a si tham lo ding.       

Johan 6:9

Suncaw malte ih ṭhathnemnak a zum lotu Andrew in, “Barli sang hlom nga le nga pum hnih in minung hizat hrang ahcun zianghman a si tham lo,” (John 6:9) a ti nain Jesuh kut sung ahcun thluasuah tumpi ah a cang. Jesuh hnenih pek ding tampi na neih lo tikah himi hi ciingmang ṭheu aw.

Boston khua ih Nipi Tlawng saya Edward Kimball cu a khaan sungih mino pakhat Khristian a si le si lo thei fiang dingin a va leng. Cuih ni ah cuih mino Dwigh. L. Moody cu Bawipa hnenah a hruai ngah tariai.

        

Kum zabu 19 ih Billy Graham a simi D. L. Moody cu Wilbur Chapman ih nunnak thlengh danglamtertu a si. Evangelist hminthang Chapman in Billy Sunday cu a thuthangṭha simnak ah tel ve dingin a zirh. Billy Sunday in ram sung khuapi pawl Charlotte, North Carolina tivek ah thuthangṭha simnak crusade a tuah. Billy Sunday ih thuthangṭha simnak ih rahsuakmi ṭhangphawknak ruangah pawlkom pakhat hram a thok ih evangelist Mordecai Ham cu Charlotte ah sawm a si. Cutawk ah Billy Graham in Jesuh cu Rundamtu ah a cohlang ih nehhnu ah kan san ih evangelist hminthangbik ah a rung cang a si.

        

Pek ding tampi ka nei lo tiah na ruah tikah Nipi tlawng zirhtu Edward Kimball in a khan sungih mi pakhat hrangah Zarhte Ni sunhnu caan a pek ih thlarau hlo a kaihnak kha vun ruat saal aw. Pathian in thil tumpi ra cang dingin rinsan tlak mi thil fate hman daan a nei.      

A thupi lozet a bang nain,

A lamdang lomi, tuah kelmi, thil fate a si khal le;

Pathian in a hmang ṭheu,

A huham in hmuh dingah.  - Sper

Pathian in a sunlawinak hrangih

thil tumpi tuahnak ah thil fate a hmang ṭheu.

Rev. Run Cung Mang ih thlahmi Nitin Thlarau Rawl sung ta a si.