A Ngaitu Zo A Si?

Philip Yancey

Siar:    :Saam 50:7-15

Ka hnenih lungawinak nan langtermi hi ka thang in ṭhattertu raithawinak a si.     Saam 50:23 

Biakinn ih Pathian biak khawmnak cu nunnomnak puai tuah vekin ka thlir ṭheu.  Thuruat thiam hminthang Soren Kierkegaard cun, “Biakinn hi laamnak innpi vekin kan ruat ṭheu. Miseenpi tonak ah toin donhleisang parih lemcang pawl ih cangvaih daan ṭhazet in kan zoh. Kan lung in awiter asile kan kutza kan beeng. Biakinn cu puai tuahnak inn thawn a linglet aw. Biakkhawm hmun ih thungaitu cu Pathian a si.

Donsang parih cangvaihmi si loin ziang thil in a khawmtu mipi thinlung sungah hmun a laak bik? Pathian kan biak tikah kanmahte thu kan sut awk dingmi cu, “Biakkhawmnak ihsin ziang ka ngah ding?” ti si loin, “Biakkhawmnak ih kan cangvaihmi ah Pathian a lungawi pei maw?” timi sawn si ding a si.

Khuahlan Israel pawl khal rannung in raithawinak pek ding daan Pathian in taimak te’n a sim hngai. Hmanseh, “Asinan nan inn ihsin nan rak kenmi nan cawcang ka ṭul lo; nan ṭilva rual lakih nan me pawl khal ka ṭul lo. Ziangahtile hramlak ih ramsa hmuahhmuah ka taa an si ih, siar cawk lo tlang parih ṭilva pawl khal ka taa an si” (Saam 50:9-10) a ti. A duhmi cu thangṭhatnak le a thu thlunnak sawn a si (c.23).

Pathian biak daan kan ṭhelh. Pathian cun thinlung ih pekmi raithawinak, sunglam nun taktak ih ap awknak le A parih lungawi thusimnak sawn a duh. Pathian biak ih tumtahmi cu Pathian ton le a lungawiter a si.    

Bawipa kan lo biaknak le kan lo thangṭhatnak,

Kan thinlung sungih Na hnenah a sungkhannak;

Saan tlakmi duhdawtnak ih peknak siseh,

Van ih rami na thluasuah hmuahhmuah hrangah. – Sper

Pathian biak lungput cu thinlung sung ihsin biaknak a si.

February 20, Nipi Ni, Rev. Run Cung Mang ih thlahmi Nitin Thlarau Rawl ta cangantui’ lungkimnak thawn kan taarmi a si.