Zumtu Nun Phun 4

Rev. Run Cung Mang

Caanghril:    :Luka 19:28-40

Thuhmaihruai:

Jesuh thawn kan pehtlaih awknak hi phun thum in sim a theih: A hnenih pan (Matt.11:28); A dungih thlun (Mark 1:17); le A hrangih feh (Matt.28:19) ti’n. Bawipa hnenah a pantu, A dungthluntu, le A hrangih fehtu dingah Bawipa in a lo ṭul. Zumtu mibur phun 4 pawl zirzoi in kan Khristian Nun kan cekfel cio hnik pei uh!

Dungthluntu mi pahnih (Luka 19:29)

“An va feh ih Jesuh in a sim vek cekci in ziang hmuahhmuah cu an hmu. Laak note cu an phoih rerolai ah a neitu pawl in, “ziangah so nan phoih?” tiah an ti. Annih in, “Bawipa in a hai” tiah an let. Cule laak cu Jesuh hnenah an hei hruai” (cc.29-34). Jesuh ih dungthlun pahnih vekin kannih teh A hrangah rinsan mi kan si ve maw? A hrangah pumpe in kan feh ngam ve maw? Bawipa in sim ding a timi cekci lawng rin-umzet in simtu kan si maw? A hrangih fehtu le pumpetu dingah in ṭul. Unau, Bawipa in nangmah rori a lo ṭul!

Laak note neitu innsang (Luka 19:33)

“Laak note cu an phoih rerolai ah a neitu pawl in, “Ziangah so nan phoih?” tiah an ti. Annih in “Bawipa in a hai” tiah an let. Cule laak cu Jesuh hnenah an hruai. Laak neitu innsang hi uar an um nasa. Jesuh Khrih in a ṭul ti an theih tikah siangzet in an neihmi rannung cu an pe. Khrih hrangah uimi zianghman an nei lo. Dungthluntu pawl ih simmi parah rinhlelhnak an nei lo. Zumtu pitling le peknak nun neitu an si. Khrih hrangah kan neihsunmi kan pe siang maw? Bawipa in na neih lomi a lo dil lo.

Jesuh thluntu miburpi (Luka 19:37-38)

“Bawipa ih hmin in a rami siangpahrang parah Pathian thluasuah um ko seh’ an ti” (cc.37-38). Jesuh laak note to in Jerusalem a luh tikah an lungawi. Asinan Pilat in, “Barabbas maw Jesuh, zo sawn ka thlah ding?” a ti tikah miburpi lala cun, “Thinglamtah ah that aw” ti’n Jesuh an phatsan (Luka 23:21). Tusan zumtu tampi tla a phuur zawng hlir ih nun kan hmang: ka piangthar, thutak ka thei ti’n kan aukio rero nain kan mizia le ṭongkam in Jesuh kan phatsan ṭheu. Zumtu kan nun daan raalring uhsi!

Farasi ṭhenkhat pawl (Luka 19:39)

Farasi ṭhenkhat pawl in Jesuh cu, “Sayapa, na dungthlun pawl hi daite in um hngai seh, sim aw,” tiah an ti. Jesuh sanlai biaknaklam ih upa pawl hi anmah le anmah cu mi thungaipi ih ruat aw le duh awzet mi an si. Midang ih sual hawltu an si. Jesuh ih dungthlun mipi an tam vingvo tikah an ngaih lo, an iksik. Miburpi pawl kha daite ih tlaanter ṭheh an duh. Tusan khal ah Pastor le kawhhran upa piangthar lo le thutak thei lo pawl cun, mipi thlarau nun ṭhangphawk le thathozet cu hmu thiam loin kham le kawk an hmang ṭheu. Farasi nun cawngtu si lo dingin raalring cio uhsi!

Thunetnak:

Duhdawtmi zumtu, dungthluntu mi pahnih bangin Jesuh ih thupekmi ṭha tein ngai ih feh le ṭuantu na si maw? Laak neitu pawl bangin, “Bawipa in ka ṭul” a ti tikah na neihmi sumsaw le thilri siangzet in na pe maw? Pathian in A thu thluntu ding le siangzet ih petu si dingah in duhsak. A nuam zawng le a phuur zawng hlir lawng a hawltu, mi phunzai hmang, mi iksik le mi soisel hmang, Pathian hnaṭuantu pawl dokalhtu dingah a lo duhsak lo. Zumtu mi rin-um, cakzet le raalṭhazet ih A hnaṭuantu si dingin zuam aw. Nangmah rori Bawipa in A hrangih nungtu dingah atu rori hi a lo ṭul a si.

__._,_.___