Lalruatcawk
1Korin 3:5-9
Appollos cu “ti toihtu” a si. Paul cu “ci tuhtu” a si. Sikhalsehla, Apollos le Paul cu Bawipa a riantu lawng an si. Pathian ih ṭuanvo pekmi ah an ṭuan fingfing. Apollos hi Ephesa khua ihsin a rami, cathiam le Pathianthu theitak a si. Kawhran zohkhentu khaipa tla a si (Dungthluntu 18:24- 28). Sikhalsehla Paul cu Pathian thuthangṭha voikhat hman thei hrih lo pawl hnenih phuansuah hi a covo a si (Dungthluntu 18:4-11). Paul in thuthangṭha a phuang ih Appollos in a ron cawmdawl. An pahnih karlakah danglamnak a um lo. Ziangahtile, Pathian hnaṭuannak ah riantu dingih kawhmi veve an si.
Rahsuah hlawhtlintheinak cu Paul le Appollos hnenah a um lo. Amah Pathian lawng in rahsuah hlawhthlinak a pe thei. Curuangah an pahnih lakah dinhmun sang hleice nei an um lo. Pathian ih innpi a simi Korin khawhhran sungih hnaṭuantu veve an si. Cutivek a si ruangah Paul in Korin pawl, uar bulce le thlun bulce nei ih kawhhran ṭhenṭhek awknak tiang an suahter hi a mawh thluk. Pathian tel lo in anmah ten an hnaṭuanmi parah ṭhanter theinak an nei lo. Amah Pathian lawng a si.
Kan ni khrihfa pawl tla Paul ih thuzirh mi sung ihsin zir ding kan nei. Kan mah le bulpak nunnak ah mi tithei zawng kan tuah thei lo caan ah kan thin a na. Mi tla kan halhsik. Mi tla kan hua. Evangelist/Pastor pakhat ih thuthangṭha phuansuahnak ruangah piantharnak kan co ih cumi Evengelist/Pastor lo hmuahhmuah Saya dang pawl cu humham nei lo deuh le thupi lo deuh ah kan ruat pang maw? Cui Saya pa ih thuthangṭha ruangah si lo in Pathian humham thiltitheinak ruangih piantharnak co theitu kan si sawn. Rawngbawlnak timi hi kilkhat lawngin kan rak tah sual pang maw? Pathian riantu dingih hriakthihmi cu rualran ten upat le ṭihzah ding an si. Mi vekin kan ṭuan thei ve lo khal le thinnau ding a si lo. Kan ti thei tawk lawng Pathian in in ngen. Cui kan titheitawk kan ṭuanmi parah Pathian in ṭuanman in pe leh ding a si.
0 comments:
Post a Comment