Saduhthah Maw Duhhrilnak?

Joe Stowell

Siar:    :Filipi 1:1-11

Cuti’n nan ṭhang asile a ṭhabikmi kha hril nan thiam ding. Cule Khrih Ni ahcun borhhlawhnak le mawhthluknak hmuahhmuah ihsin nan thiangfai ding.     - Filipi 1:10

   

Ka nunnak ah ruahnak ṭha pekmi tampi ka dong. A ṭhabikmi pakhat cu ka rualpi pakhat ih ruahnak fim i pekmi a si: “Na nunnak cu na saduhthahmi in a sersiam lo, na duhhrilmi in a sersiam” ti a si.

A dik a si. Tuni tiang na nunnak cu na duhhrilmi zate ih rahsuakmi a si. Cumi thawn bangrep in Paul ih ruahnak pekmi khal ah, “A ṭhabikmi kha hril nan thiam ding,” (Filipi 1:10) a ti. Ziangvek dinhmun khal ah duhhril ding a um ringring. A ṭhabikmi, a ṭhami le zaran (ṭha lo sia lo) tiah a dotdot in hril ding a um. Pathian cun a ṭhabik hril ding in duhsak.

           

A ṭhabik hril ngah thei dingah sawmngiar (challenge) kan si. A caancaan ahcun kan duhhrilnak le kan zalennak cu dawnkhamnak tuar vekin kan thei aw ṭheu. Asinan Paul ih ruahnak pekmi na thlun asile, “Jesuh Khrih lawngih pek theimi ziaza ttha taktak cu na nunnak ah a khat dingih cumi cu Pathian thangṭhatnak le sunlawinak ah a si ding” (c.11).

Na nunnak cu duhdawtnak, lungawinak, hnangamnak, thinsaunak, zaangfahnak, ṭhatnak, rinsantlak mi sinak, lungneemnak, tangdornak le thin suup awk theinak nun ih nung dingah duhhrilnak nei aw (Galati 5:22-23). Cuihsin a ra cang suakmi parah nuamzet in um aw!     

Duhhrilnak fatete kan tuah a ṭul,

Kan lamzin zawhmi in kaihruaitu dingah;

Tleunak lamzin kan hril ding maw?

Zaan khawthim lakih tawivak reronak?  – D. De Haan

A ṭhabikmi hril awla a rasuak murmomi thluasuah zoh aw.

Hminsin:    :Rev. Run Cung Mang ih thlahmi Nitin Thlarau Rawl ,February 18, Tlawngkai Ninga ta cangantui' lungkimnak thawn kan taarmi a si.