Nitin Pathian thawn (Khrih thinlung Neitu)

Lalruatcawk

1Korin 2:16

Cathianghlim in “Bawipa ih thinlung cu zo in so a thei? Zo in so ruahnak a pe thei ding a ti.” Sikhalsehla kan nih cu Khrih thinlung neitu kan si.

Pathian ih thinlung theih hi minung thluak cun theih a har ngaingai mi a si, thil cang thei khal a si fawn lo. Rom Bung 9 sungah kan zoh a si le, Pathian cu a mah palung ih thuṭhentu a sizia thu kan hmu. A thuṭhennak khalah zohman in thusuhnak an tuah thei lo. Ziangahtile Pathian cu Lal a si. Pathian cu rel lo, kanmah le unau suahpi thinlung hman kan theithluh thei lo. Kanmah le mah lala khal kan thinlung kan theihawk lo caan tampi a um. Jesuh hman in Pa Pathian ih tumtahnak thinlung a thei thluh lo. A Dungthluntu pawl in Bawipa ziangtik ah saw na rat sal ding tiah an suh tikah, ka ratsalnak ding ni cu vancung ih a ummi ka Pa lawngin a thei tiah a ti.

Sikhalsehla Cathianghlim cun “kan nih cu Khrih thinlung neitu kan si” tiah in sim. Paul in Khrih thinlung neitu kan si a tinak san kan zoh ding. Bung 1 cang 10-17 le bung 3 nak kan siar peh vivo a si le, Korin zumtu pawl lakah ṭhenṭhekawnak a rak um ruangah a si. Curuangah Khrih cu ṭhenṭhek awmi a si lo. Zentel, Hebru ti a um nawn lo. Kan zaten Khrih sungah pumkhat kan si ti duhnak in a sim. Khrih neitu kan si ahcun Khrih thinlung cu kan nei a si. Cui Khrih thinlung neitu kan si vekin kan lakah hmuhsuam, nautatnak le thleidanawknak a um a si le Khrih thinlung in kan sungah in luah lo tinak a si. Curuangah kan Khrih thinlung phentu Satan thinlung a ra luh a si le sualsirnak thawn Satan kha do uh si.