Nitin Pathian thawn (Rintlak Inn Saktu)

Lalruatcawk

1Korin 3:10-15

Korin khua ih zumtu pawl ṭhenṭhekawknak thu thawn pehpar aw in Paul in amah le Apollos kar lakih Pathian pekmi hnaṭuan laksawng cu innsak thu thawn thuṭhimnak a pek hai. Paul cu innhram ṭohtu a si. Sikhalsehla innhram ṭohtu a sinak hi Apollos hnakin a thupi sawn tinak a si lo. Apollos hnakin Pathian dungtluntu hmaisa a si ruangah sawn a si.

Zozo khal Pathian ih fialmi Pathian hna hi ṭuan hmaisa le neta ti si lo in, Pathian laksawng a simi kan ṭuanvo fingfing ah ṭhaten rinum zetin kan tuan maw ti mi parah sawn a si. Pathian ih hnaṭuantu siahhlawh fingfing ah thupi sawn le thupi lo sawn timi a um thei lo. Ziangahtile Pathian in Jesuh Khrih lawng hi inn hrampi dingah a ret zo a si. Paul in cui innsak hnaṭuannak ah hnaṭuan daan phunhnih in a rel. Phunkhatnak cu sui le ngun a si lole lung mankhung hmangih saktu pawl an si. A phunhnihnak pawl tla cu zanthing le cang pawl ih saktu pawl an si. Sikhalsehla Bawipai ni a ra thlen tikah meisa in hniksak leh a si dingih, meisa ih a siatsuah theilomi ih sak a thupit zia thu a sim. Meisa ih siat theimi ih inn a saktu pawl cu ṭuan man nei lo an si leh ding.

Curuangah Pathian hnaṭuannak ah mai ṭuanvo fingfing parih rinum tei ṭuan hi Pathian duhzawng a si. Mi ih sunloih le lom hlawh duh men ruangah dinhmun ṭha kan timi zuan in kan cuh awk ṭheumi tla hi kanmah le mah mualphoh aw men kan si. Culawng si lo in kan member le kan pawlkomnak sungah ṭhenawknak a suah ter. Cu hmuahhmuah tlunah Bawipa ratsalnak ni ih thuṭhennak ah ṭuanman laksawng khal kan co lo ding, ziangahtile kan co Pathian laksawng parah rinumten ṭuan lo in, mi’h comi Pathian laksawng lawnglawng halhsik in co kan tum ve.