Mary Lungput

Falamite

Luke 1:37

Ziangahtile, “Pathian hrangah cun thil cang thei lo a um lo,” tiah a ti.

Fala thainghlim a si, fala him a si, fala no te a si fawn. Vancungmi a hnenah a lang cu a hrangah mangbangza a si ko, culawng si lo, vancungmi ih thuken cu a hrangah khawruahharza ngaingai a si.
Cui fala no te cun thusutnak nei saal tengteng ding a si hrim ko, “Ziangtin maw nau cu ka vun thei ding, mipa thawn kan pawl aw dah ual lo.” A mangbang in thu a sut ko.

Cui a thusutnak cu vancungmi in a let, cu mi in Mary ih nun ah,“Pathian hrangah cun thil cang thei lo a um lo” ti fiang ten zum hnget in cui thu sawn ah a nun a ṭhum lan cih ta mei. Zianghman a sut bet nawn lo. Ziangtin, a si ngaingai a si le, thungai a si ahcun cubang khabang mangbangza pawl in hmuh aw… zainghman a sut bet lo, a ngen bet nawn lo.

Vancungmi nih a simfiang, “ Thlarau thianghlim na parah a thleng ding, cungnungbik ih huham in a lo tuam ding”…. “Na sungkhat nu Elizabeth khal a tar zet hnuah fa a vun”.... A netnak ih a timi cu, “Pathiang hrangah cun thil cang thei lo timi a um lo.”

Mary in tangdornak thawn a let, “Kei cu Bawipa ih salnu ka si, na sim vekin ka hnenah thleng ko seh.”

Kan hrangih Pathian tumtahnak pawl cu kanmah minung lam kan sinak, ruah theinak le tuah theinak ih khatlam raal ah a si sawn ṭheu. Kan thil titheinak nih a tumtahnak pawl hlawhtling ter ban rual a si lo, Cucu Pathian ih duhmi ziin a si fawn.

A tumtahnak pawl a phuanglang tikah kan tuahsuak theinak ding khalah a mah lala nih thutiamnak in pek cih ringring. A thupi mi cu, “Kan zum maw?” ti si ko.

Pathian na hnenah a phuangawk tikah ziangtin na sawn? Mary cun minung lamih cang thei lo nak pawl zoh sawn lo in Pathian cun ziang hmuahhmuah a ti thei timi ah a ṭhumawk sawn, cun, tangdor in, “ Na sim vekin ka hnenah thleng ko seh” tiah a sawn.