Nitin Pathian thawn (Khrih ah Rualremnak)

Lalruatcawk

1 Korin 1: 10-17

Korin zumtu pawl cu uar hleice mi nei in an lakah ṭhenawknak an suah. Mihrek in Paul dungthluntu ka si, mihrek in, Apollos, a hrek in Cephas, mihrek in Khrih  tiah an buai. Sikhalsehla, Khrih cu ṭhenṭhek aw mi a si lo (v.13). Thinglamtah parah an thah mi khal Paul a si lo. Paul hmin khal in tihnimnak an co lo. Khrih Jesuh sawn a si thinglamtah parah an thahmi cu. Khrih Jesuh hmin lawngin tihnimnak khal an co a si. Tihnimnak petu dingah Paul cu tirhmi khal a si lo. Thuthangṭha phuangsuak ding lawngih thlahmi sawn a si.

Curuangah Paul cun, Bawipa Jesuh Khrih hmin in pakhat le pakhat lungrual ten um dingah a dil. Ziangahtile Jesuh Khrih cu pawlkomnak nun timi ih hrampi a si (v.9). Cui Khrih sungih a ummi pawlkomnak nun an neih hnu lawngah rualrem zetin, thinlung hmunkhat nei in an um thei ding a si. Apollos, Cephas le Paul tivek pawl cu an mah le tumtahnak ciar hrangih tirhthlahmi lawng an si. Paul khal a minung fimthiamnak hmangin Khrih ih ṭuanvo pekmi thuthangṭha a phuang lo.

Minung kan si vekin zumtu pakhat le pakhat kan pawlkomnak ah uar deuh bul ce, sunloih deuh ce mi kan nei ṭheu. Cuvek thinlungput kan neih ruangah kan sual tinak cu a si lo men ding. Nan cui kan lungput in kan pawlkomnak sungah ṭhenṭheknak a suahter a si ahcun Khrih sungih pumkhat kan sinak kan hloter tinak asi. Ziangahtile, kan thiamnak, kan fimnak, kan sinak pawl hi Khrih ratsalnak caan ih mawh nei lo kan si theinak ding hrangah pekmi thlarau thianghlim laksawng an si (v.8).