Nitin Pathian thawn (Pathian ih fimnak le a ṭawmtu pawl)

Lalruatcawk

1Korin 1:20-25

Pathian in leilungtlun mifim pawl le thuruahnak pawl hmuahhmuah cu aatnak (aatthlak) ah a can ter. Ziangahtile cui leilungtlun fimthiamnak pawl cun Pathian an thei thei lo. Judah mi pawl cun hmuhsaknak in Pathian an hawl. Greek mi pawl cun fimnak in Pathian an hawl. Sikhalsehla cui fimthiamnak le milai ruahnak pawl hmuahhmuah cu Pathian ih aatnak hman an bang lo.

Pathian cun kan fimnak le kan thuruah thiamnak hi zianghman ah a siar lo. Mi hrangih (Judah, Greek) aatthlak a si mi Khrih thuthangṭha zumnak sawnin Pathian cu a lungawi ter. Khrih thuthangṭha hi zumlotu pawl hrangah aatthlak a si. Ziangahtile annih pawl cu Pathian ih ta an si lo. Cui Pathian fimnak nei dingah cun Pathian fa te sinak neih a ṭul. Zumlotu pawl hrangih aatnak cu zumtu pawl hrangah cun huham le thiltitheinak a si.

Pathian ih fimnak co thei dingah thil pahnih a ṭul. Cu pawl tla cu: Jesuh Khrih le zumnak an si (v.21). Khrih cu Pathian ih thiltitheinak humham le fimnak a si (v.24). Jesuh Khrih kan zum ahcun Pathian fimnak neitu le cotu kan si. Pathian ih fimnak kan tlasam ruangah nitin kan nunnak ah vei tampi kan buai ṭheu ringring. Kan hmuhtonmi pawlih duhcan kan thei thluh fialfial lo. Kan theih lo ruangah Pathian tla kan mawhthluk. Pathian kan mawhtluk a si le kan mah le kan mah fim aw ter kan si. Sikhalsehla Pathian ah zumnak kan nei a si le harsatnak le buainak kan tonmi pawlih duhcan kan thei leh tengteng ding a si. “Ziangah tile Pathian aatnak cu minung ih fimnak hnakin a fim sawn; cule Pathian ih ṭonṭaihnak cu minung ih cahnak hnakin a cak sawn.”