Thla 12 an Thawhkehdaan (June)

Anthony Bawi Lian Thang

June

Rome mi Biazai nganthiam Ovid cun ‘June’ timi ṭongfang cu Rome pathian bawibik ‘Jupiter’ ih a nupi a si mi ‘Juno’ in a ra mi a si tiin a rak ngan. Juno cu nu hmuahhmuah kilvengtu, zohkhentu le ṭhit-umnak a rak fektertu a si tiah Rome mi pawl cun an rak zum. Curuangah Rome mi pawl cun June thla sungih innsang din hi a ṭha ih thlasuah donnak a si, te le fa tla an damcak tiah an rak zum.

Kannih laimi pawl khalin June thla ih innsang din hi a ṭha tiin kan pupa pawl in an rak ti ve. June timi ṭongfang cu Rome miphun hmin ‘Junius’ in a ra mi a si. Junius timi innsungsang le te-fa pawl hi Rome thuanthu ahcun a cakbikmi le a hmin a rak thang zetmi innsang an rak si ve. Curuangah an miphun hloral lo nak dingah an rak sakmi a si ding tiah zum a um. Midang ih an ngan dan a si ahcun June timi cu Latin ṭong ‘Juniore’ in a rami a rak si ih a sullam cu ‘Mino pawl’ tinak a rak si. Curuangah mi tampi cun June thla cu Mino pawl upat sunlawih peknak thla a si an ti.