Lalruatcawk
1Korin 1:4-9
Pathian ih sinak pawl- zangfahnak petu Pathian a si (v.4). Thlarau laksawng petu Pathian a si(v.5). Bung 12-14 ah siar bet aw. Cui laksawng pawl cun Khrih ih ratsalnak caan tiang hlawptlo zetih hngah theinak thazang in pe (v.7). Bawipa Jesuh ih ratsalnak ni ah, mawh nei lo mifamkim kan si theinak dingah in kilkhawitu asi. A thukammi parah rinsantlak a si fawn (v.9).
Jesuh Khrih ih sinak pawl: Pathian ih pekmi zangfahnak Khrih sungah kan co (v.4). Jesuh Khrih ih thuhla phuansuahmi pawl thutak an si zia Korin zumtu pawl ih nunnak ah a lang (v.6). Khrih cu amah a zumtu pawl hrangah a ra sal ding (vv.7-8). Amah zumtu pawl thawn nitin pawlkomnak nun neitu a si (v.9).
Kan nih Jesuh Khrih zumtu pawl cu, Pa Pathian ih zanfahnak Khrih sungah kan co. Amah hnen lo ah zangfahnak khuitawk hman ah a um lo. Minung kan rinsanmi pakhat hnen ihsin zangfahnak timi kan co thei. Sikhalsehla Pathian in Khrih sungih in pekmi zangfahnak cu kumkhaw daih mi a si. Nitin kan nunnak harsat mangbang vansan kan ton caan ah nun lungawinak thuthup kan co. Nitin sualnak leitlun ah tlangleng hman nungla Pathian zangfahnak cun mawh nei lo ah in rel. Kan Bawipa Jesuh Khrih a ratsal hlan tiang thatho zetih ka nun theinak dingah Thlarau laksawng pawl tla in pe. Cui thlarau laksawng pawl cu zumtu pakhat le pakhat somdawl awknak dingah an si. Mirin-um sinak, mi zawnruah thiamnak, hlasak thiamnak, fimthiamnak, Pathian thu thiamnak, lennak, tangdornak,(etc) pawl tla nitin kan ṭul mi thlarau laksawng pawl an si.
0 comments:
Post a Comment