Thla 12 an Thawhkehdaan (August)

Anthony Bawi Lian Thang

August

A hlan Rome nithla an rak siarnak ah cun August thla hi thlaruknak a rak si. Latin ṭong cun “Sextilis” tin an rak ko. A sullam cu “Paruk” tinak a si. Nithla thar siarnak an ron suah tikah thlariatnak ah an run ṭhin, asinan a hmin cu an run thleng cuang lo, Sextilis ti a si thotho. August cu a hmaisabik Rome uktu Siangpahrang a si tinak langter duh ah  “Sextilis” cu  B.C 27 ah “ Augustus” ti ah an rak thleng.
Augustus cu B.C 63 ah a suak ih a hmin cu Guius Octavius (Octavian) ti ah an rak sak.  Octavian cu Julius Caesar in a duhdawt zet ruangah a rocotu ding  dinhmun tiangin a rak ruah mi pa a si. B.C 44 hrawngah Octavian cu Illyria ram ah tlawng a kai, cui a kai laiah, Julius Caesar cu an rak that. Cui sin rei lo te ah Italy ram ah a feh. Julian miphun  (Julian clan) ka si a ti awk ruangah  “Gaius Julius Caesar Octavianus” timi hmin an rak pek. Octavian cu B.C 29 ah uktu a hung cang, amah hi ukawknak lam le raldonak lam ah mi hminthang le a rak cak zetmi a si. January 17, B.C 27 ah Roman Senate in upatnak hmin an rak pek, cucu “Augustin” ti a si. Asullam cu “Upat ṭihzah tlakmi” (Vanerable/revenrend) tinak a rak si. August thla in ni 31 a rak neihnak khal hi July thla hnakin tam deuh nei seh ti an duh ruangah a rak si ti in an ngan. August thla cu Siangpahrang Augustin upatnak le sunlawihnak hrangih an rak sak mi thla a si.