St.Francis of Assisi (Khrih nunziamawi thluntu)

Johnlsl

1184, Assisi, Italy ah Francis cu a suak. A pa cu pursumnak lamih hlawhtling zetmi a si ih mi hmuahhmuah nih rinsan le upatmi a si fawn. Francis cu fimzirnak, lennak, rualpi sungkua makmak le puai ropui tak tuah ringringnak pawl lakah ṭhanglian in puitlingmi a si. A nun ah donhar ding le phan ding zianghman um lo in hnangamnak le nomnak hlir nih a kulh. Ralṭhatnak, hminthannak le hlawhtlingnak pawl ngah ding ti ruahsannak tumpi thawn ralkap ah a lut, nan, a si ta lo. Dam lo in beidong le ningzak in a ra kir. Cu in Francis ih nun ah thlengawknak tumpi a thok.

Francis cu rualpi le pawlkom thawn nuamcen in a um peh hrih ko, nan, a thinlung ah lungawinak le diriamnak cu a hlan
vekin a um nawn ta lo. An khua ih mi farah zonzai, dam lo, miphar pawl le kutdawh pawl hnenah a paisa a pek thok phah vivo. Cui paisa pawl cu a pa’i hawlmi tangka pawl an si. A pa cu a thinnuamlo ngaingai, a fapa ih tuah rero mi pawl cawlter dingin a zuam. A kham thei lo tikah a netnak ah thlawnginn sung tiang a va ret. Francis cu a thlengaw cuang lo. A nunnak hmuahhmuah Pathian hnen ap in Jesuh Khrih vekin midang hrangah ṭhahnem ih nung ding pakhat lawng fiangten a tumtah zo ruangah a si.

Voikhat cu Matthew sungih Bawi Jesuh ih thusimmi nih a nun ah hna a ṭuan. “ Feh tahrat in thuthangṭha phuang aw. Sui le nugun, paisa pakhat te hman keng hlah.” Cui zing zingkhawm ṭheh veten a neihmi sumpai le thilri hmuahhmauh kutdawh pakhat hnen a pek. Cutin ziang pakhat te hman keng lo in an ram pumpuluk hel in sulsirnak, unau duhdawtnak le daihnak thuthangṭha pawl cu a phuang.

A rei hlanah mino hrekkhat in Francis ih nun zoh in a nunzia le a thil timi pawl an cawng. An hrangih nuam le semrem a si mi nun pawl tansan in zaran vualvo ten um in Pathian ih duhdawtnak thuthangṭha cu an phuang. Cuti ih a nungtu mino pawl cu minih an thei viov ih ‘unauza’ tin an ko hngai, pakhat le pakhat tla ‘unau’ tin an ko aw. Francis vekin an neihsiah pawl hmuah an tansan. Pathian an duhdawt vekin an innhnen pawl an duhdawt ve. An hnaṭuannak thawngin a tlasammi tampi lungawinak an co ih mi damlo tampi in damnak an hmu. A hleice in mah minung pi pawl lala ih hnon a si mi miphar pawl nasa takin an kilkhawi. Midang pawl cun an thinlung ten cu pawl cu an upat cio thlang. Thuthangṭha an sim tinten ṭhaten an rak ngai cio ih sualsir in Pathian thu sungah an nun an thleng. Mi tampi in Pathian ih ngaidamnak le Khrih sungih zumnak ti pawl tla an theifiang ngah.

Caan tawkfang rei ah, nunau hrekkhat tla cu’i Francis le unauza pawl in menmen teih nun timi nih a ciahneh hngai ve. Zaankhat cu Clare timi, milian zet fala note cu Francis teih hnenah a ra. An sungsang pawl ih lennak le ropuinak pawl kha thupi ah ret lo in a tansan. Zaran te men ih nung tahrat in Pathian hna ṭuan sawn sehla ti hi a duh. A pa’i thei lo laiah a thupten inn in a suak ih unauza pawl hnenah a ra pok suak. Francis in lungawi ten a rak hmuak. Cun Clare ih a mawibiknak a simi a sam cu a tan sak, cucu amah ih mawibiknak hman ui lo in Pathian hnenah pum a pek awk ti langtehnak ah a si. A pa nih a thei ih a thin a heng ngaingai, inn ih hruai saal dingin  a va pok. Clare in a pa hnenah a sam a tanmi le zaran menmen a si mi hni le puan a hruk mi pawl a hmuh tikah a pa cun hih a tumtahnak cu hnegthkhoh tuk in a tuah zo, ka ko kir saal thei nawn lo ding ti a theifiang.

Clare cu mi lungawi a si. Diahnak, hnangamnak le nun diraimnak pawl Pathian thu sungah a hmu suak. Buainak a tongtu pawl hnehah Pathian thu in daihnak a va thlen. Jesuh ih thupekmi pawl thawn mi hnen thazang pe in a tungding hngai. Nunau dang pawl tla a hnenah ra in, ra kom in , hna an ṭuan tlang hngai. Pawlkom te ah an cangih a hmin ah “Poor Clare” tiah an ko.

Francis le unauza pawl hnenah mi tampi an ra tel sinsin. An duhmi le an tumtahmi cu ‘Khrih ih nunziamawi cawng ih nun’ tihi a si. Mi tampi cu missionary ah an cangih ramleng pawl ah suakin ramthim an nor. Farah le zonzai duhdawt in an tuamhlawm.

1226 ah lungawinak, hnangamnak le nun diraimnak thawn a khatmi Francis cu a thi ta. A nun sung hmuah Jesuh Khrih ih tanta mi keneh pawl thlun in a nung. Jesuh leitlun a rak ṭum tikah a sinak hmuahhmuah, vancung sunlawinak pawl tansan in nautabik ah a rak cang ti a theifiang. A cancan ah a ril rak rawng ve. Inn le lo tla a rak nei dah lo. Jesuh cu tangdor le zaran nun menmen ten a rak nung. Cupawl cu Francis hrangih a zohṭhimmi le a cawnmi nun cu a si. Francis cu a leitlun lennak le nomnak pawl tansan in Pathian ih lennak taktak sung sawn ah nunnomnak a comi pa a si.