Na ṭongkam le a hmual (1)

Rajiv Falam

Milai ṭongkam cu huham in a khat. Mi a dam ter thei, mi a tuahmawh thei. Mi a lungawi ter, mi a riahsia ter. Mitampi cu ṭongkam ruangah an innsaang ah buainak an tong, nupa ṭhenawknak tiang a thlen pi. Hrekkhat cu an ṭongkam ruangah hnaṭuan ihsin dawi an tuar. Si, ṭongkam cu huham umnak le khawlawnak hmun a si tin kan ti thei.

Curuangah ziangvek ṭongkam kan hmang ding ti le ziangvek ṭongkam kan hril ding ti hi a thupi nasa. Kan ṭongmi ruangah a cang dingmi pawl parah ṭuanvo kan nei.

Milai in kan lei (tongue) kan kilkhawi thei lo, Bawipa'i bomnak lo cun. Curangah nitin in Pathain hnenah kan lei kan kilkhawi theinak ding hrangah thlacam a ṭul. Mi tamsawn cu Pathian ih in thlawsuahmi le in tuahsakmi thu hnakin kan tonmi harsatnak le buainak thu kha kan rel tam sawn.

David in Goliath a hmu tikah, Goliath tum zia le cakzia, a thil titheizia pawl a ṭong lo. Pathain ih kut cak a nun ih a langzia pawl kha a ṭong sawn (Bawipa'i thawngin kiosa a neh zia, cinghnia pawl a neh zia thu pawl).

Bawipa in thu in kam mi cu ziangtik khalah ka lo taan ta lo ding ti a si. Kan tuar thei lo mi hniksaknak in tong ter lo ding, hniksaknak kan ton khalah luattheinak ziin in ong sak ding. Curuangah "ka tuah thei lo ding, ka neh thei lo ding, ka ti thei lo ding, a har tuk aw, ti lo in, Khrih thawngin ka neh thei ding tin ti sawn ding kan si. Ziangahtile beidonnak ṭong na ṭongmi in a lo tlasam ter sawn a si. Kan ṭong dingmi cu Khrih thawngin ka tuah ṭulmi hmuahhmuah ka tuah thei, amah nih nehnak in pe ding ti hi a si. Na ṭongkam in bawm aw tum aw, thinnau aw ter hlah.

Source:      : Joyce Meyer ih The power of words