Pathian le Hnaṭuan

HmingLian

Pathian cu hnaṭuantu a si. Hiti vun ti ve ten “hnaṭuan” timi ah hleice nak a um ti a lang cih. “Hnaṭuan” timi sungah mankhungnak timi sinak a nei cih. Pathian in a sersiam mi kha ṭha a ti tikah a hnaṭuan khal kha ṭha a tinak a si thotho. Curuangah “hnaṭuan” timi sungah Pathian ih lungkimnak a tel ve. Kan zapi kan theih cia bangin minung cu a sersiam tui hmuihmel keng ih sersiammi a si timi thutak cu kan thei. Pathian cu hna a ṭuan kan ti ruangah amah bangin a sersiam mi cun hna a ṭuan ve ding khi a si. Minung cu hna ṭuan dingih beiseimi kan si.

Minung in sersiammi zaten a uk ṭheh, sersiam mi dang pawl a kut hnuai ah a ret ṭheh ih lei ihsin suakmi pawl a ei, kan timi hi minung cu hnaṭuanmi a si ruangah a si. Hna a ṭuannak ihsin a uk thei mi pawl an si (na mitthlam ah ramsa duh tawk ih kan kaih thei dan pawl leh thingtheirak kan cin leh kan lawh dan pawl lang ter aw). Pathian lawng hna a ṭuan lo, minung tla a ṭuan nasa. Thusimtu 3:13 ah hnaṭuan hi Pathian ih laksawng a si, a ti (a in a ei ih a hnaṭuannak ah lungkimnak a neih hi Pathian ih laksawng a si).

Hi Bible cang leh a dang bung le cang pawl in hnaṭuan thu an simmi in kan hnaṭuan hi upat tlak a si, tin an sim duhnak a si. Pathian hmuihmel kengtu kan si bangin, midanglam kan si ih hna kan vun ṭuan tikah Pathian kan bangnak kan langter mi khi a si. Pathian ih hnaṭuan lawng a sunglawi a si lo, minung ih ṭuanmi tla a sunglawi thotho. Hnaṭuan cu Pathian ih hriakthihmi vek a si. Hna na ṭuan na ti tikah Genesis 1 sungih Pathian in “a ṭha tuk” a timi vek khi a si. Pathian in mankhung ih a ruatmi a si.