Johnlsl
Mi pakhat nih len le farah tep tlang, sal sinak le bawi sinak co tlang, Christian si ve si, zumtu le si fawn lo ti pawl hi thil cang thei lo mi pawl kan tile a sual tuk lo ding. Nan, hih thil pawl le hi hnak ih mak sawn pawl hi Patrick nun ah hmuh theih in a um. Mangbangza khop ih roling mi hih missionary pa’i nun kan zoh a si le khawruahharza ngaingai a si. Pathian nih Ireland ram pumpi rori Christian ram ah cang dingah Patrick cu a hmang ta riai.
AD 389, Britain ah a suak. Milian zet sungsang an si. Cui lai caan cu Britain cu Romam Empire ih ram ṭhen pakhat a rak si ih Christian ram a rak si. Patrick cu Christian sungsang an ṭhang in Christian ih sinak le thu-hla pawl a thei ṭheh ko nan nun pi dingah a rak paih lo. Cu ai-ah nuam le ceen, ti-huahho ih um hi a rak hril sawn.
A kum 16 ah Patrick te khua cu Irish pawl nih an rak siim. A nu le pa cu lamhla ah khual an tlawng. Patrick cu an kai. Irish pawl nih lawng in an phur ih sal ah an zuar. Irish pawl cu Pathian zumtu an rak si lo, Christian ih zumnak, sinak le mawinak pawl tla an thei lo. Patrick hrang ziangtluk a har ding ti cu sim ṭul lo in kan fiang ko ding. Reilo ah hnaṭuan pakhat an pek, cucu tuukhal ding ti a si. Cutin tuu cu a khaal ringring. Nikhat cu tuu a khaal lai ah Pathian thu a theih cia mi pawl a thinlung ah a ra suah saal ciamco, cule a ruat, Jesuh Khrih ih in duhdawtnak, in ngaidamnak, in runnak, cuti cun a mah le mah Pathian hmai ah misual ka si ti a hmu fiang awk. Thla a cam, ngaidamnak a thar in a dil. A tuu khalnak hmun ah Pathian thawn pawlkomnak an nei, cutin nuntharnak a co ta. A nun hmuahhmuah Pathian hnenah a hlan cih. Thlacamnak le Pathian thawn pawlkomnak ah lungawi in a caan pawl cu a hmang.
Zaan khat cu a tuu pawl a zoh lai ah hmuhnak (vision) a co. Aw pakhat nih a sim, ‘lawng ah feh awla na inn ah tlung aw.’ A thaizing zingpit ten a hnaṭuannak in a tlan. Tifinriat lam panin peng 200 lai ke in a feh hnuah lawng pakhat feh zik ih um cu a tong. Cui lawng thawn Britain ih an inn ah a tlung. A nu le pa ih lungawi daan cu! Si, lungawi hrimhrim a tlak ko, an fapa nung cingin an tong saal ngah cu! Ireland ih saal kum 6 a tannak ihsin Patrick cu a luatsuak ta riai.
Zaan khat, an inn ih ropinak pawl le a pa’i lennak pawl ah hnangam ten a um rero laiah hmuhnak pakhat a co saal lala. Cucu Ireland ah feh saal aw ti a si. Cui a hmuhnak cu a nu le pa a sim tikah an nih in Ireland ih va feh saal ding cu an lung a kim thiam lo. Nan, Patrick cun Pathian hnen ihsin a rami si ti a theifiang ruangah ka feh tengteng a ṭul a si a ti. Cutin sal ihsin a luatmi pa cu Pathian thuthangṭha phuang dingah a sal tannak ram Ireland ah a pok saal lala.
Patrick cun Ireland ih minung pawl a thei hngai nasa, an ṭong a thei, an nunphung a thei, an sakhua le zumdaan pawl a thei thluh. Pathian nih cui a thei zetmi minung pawl hnenah a thu phuang dingah a hril tikah lungawi ten a cohlang. An ram pumpuluk ah vak in thuthangṭha cu a phuang. Mi tampi in Khrih cu an zum ih tihnimnak tla an co. Kawhhran tla an din thok ih Bible zirnak le Christian nun zirhawknak pawl tla an nei. Caan tampi ah Patrick cu an khawvel sakhua hotu puithiam pawl ih thu a kalh ṭul ṭheu. Cui puithiam pawl cu an thin a heng thei ngaingai. Voi tampi thawnginn ah an thlak. Si nan a luat saal ringring. Khrih ih thuthangṭha sim le phuang dingah zohman le zianghman nih a kham thei ta lo.
AD 461, a kum 72 ah a thi. Mi thawng tampi cu khawvel biaknak ihsin a nungmi Pathian biaktu ah an cang. Ireland tla Christian ram ah a rung cang ta. Patrick in mipi pawl cu Bible ih thupit zia thei dingin le Bible a duhtu si dingin nasa zet in a zirh hngai. Thuthangṭha phuangdaan ding le simdaan ding tla tlawng din in na sa zet in a zirh hngai. A thi hnuah Ireland mi, mi tampi cu thuthangṭha a thleng hrih lonak hmundang ramdang ah feh in Pathian thu an phuang, kawhhran an din. Pathian in rampi pakhat thelng dingah mangbangza in a minung pakhat a hmang thei ti Patrick nun in kan zir thei a si.
0 comments:
Post a Comment