Thlarau mi vs Tisa mi

Lalruatcawk

1Korin 2: 13-15

¹³Curuangah Thlarau a neimi pawl hnenih thlarau lam thudik kan simfiang tikah milai fimnakih zirhmi ṭongkam hmangin kan sim lo. Thlarau ih zirhmi ṭongkam kan hmang a si. ¹⁴Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si.
Himi Bible catlang kan siar ve ten, thil phunhnih a simi thlarau mi le tisa mi thu kan hmu. Thlarau mi cu Pathian ih laksawng Thiang Thlarau cotu a si. Thlarau ih zirhmi fimnak hmangin a ṭong. Thlarau mi cun ziangtinkimah a dikmi thuṭhennak a tuah. Mizokhal in a parah mawh an thluk thei lo. Sikhalsehla tisa mi cun minung fimnak hmang in a ṭong. Thlarau thil a theithei lo. Pathian thlarau hnen ihsin a rami laksawng khal a co thei lo, ziangahtile Thiang Thlarau a sungah a um lo. Thlarau thu a theihthei lo ruangah a hrangah cun aat-thlak an si.

Leilungtlun thuruatthiam(Philosophers) pawl khal in Pathian le Thlarau thu an ruat ban lo. Thu an ruah tam poh a si le Pathian thawn an hla aw sinsin. Pathian thu hi minung thluak ih ruah ban ding a si lo ti hi a fiang. Mihrek cu Pathian um lo tiah laisuak tum in ṭan an lak nasat laiah Pathian an hmu suak riangri. Rangoon tlawng ka kai lai ih kan Saya German mi Alexander Xeibel hi Scientist a si. Pathian um lo zia laisuah hi a hnaṭuan pibik a rak si. Sikhalsehla Pathian um lo zia hmuh a tumnak in Pathian a hmusuak sawn ta riangri. Mihrek khat lala le Pathian an hawl ih, an hawlnak ah Pathian um lo tiah an suah. An Pathian hawlnak ah an mai tisa thluak (ruahtheinak) an hmang tuk sual a si ding. Curuangah Thiang Thlarau tel lo, thluak lawng hmangih Pathian fimnak ruahsuah tum cu ṭihnung a si.

Pathian ih fimnak theitu si ding cun Pathian pekmi Thiang Thlarau kan neih a ṭul a si. Cuhnu lawngah thlarau thil pawl kan theithei ding a si. Kanmah le kanmah lala khalah, Pathian thlarau fimnak  ringlo in kan mai theihnak le ruahnak kan rinsan caan ah tuahsualmi tampi kan nei ṭheu. Curuangah thlarau lamah mi ṭawnṭai te kan si khal le, thlarau fimnak dilin ziangkim kan tuah hlanah Pathian hnenah thlacam uh si. Thlarau lamih kan rinsanmi rual le pi hnen khal in Thlarau fimnak hawl uh si.