Thlacamnak ih Hmual (1)

Anthony Bawi Lian Thang

Thlacamnak kan timi cu Pathian le minung naiawzet le  hmunkhat te ah saduhthah relkhwam le biakawk kha  a si. Thlacamnak hmaan le dik kan timi cu mah duhnak lawng tlun ih ṭong rero tu si lo, Pathian duhnak khal ngai paih le thlun paih ih thlacam hi thlacamnak hmaan le dik (True prayer is a dialogue) cu a si.  Cun kan sinak vek cekci in supmi le thuhmi nei lo in Pathian hmaiah cemverver in phuansuah awthluh kha a si. Kannih zumtu pawl ih kan thlarau hrangah le kannunnak hrangah a ṭul bikmi cu thlacamnak a si. Jesuh ih zirnak le a nun ah a thupitzia kan hmu thei. (Mtt. 14:23,26: 39, 7: 7-11, 8:1-13.18:19-20.Luk. 23:34, John.17). Kan theih ṭulmi pakhat cu thla kan cam tikah kanmah le kanmah kan biakaw si lo in Pathian kan biak a si ti kan thei a ṭul bikmi  a si. Thlacamnak cu kan nunnak lamtluanah lungawinak le cahnak thazaang in petu  a si.

Kan thutlangpi ah thlacamnak ih hmual ti a si ruangah thlacamnak in ziangtluk in thil a tithei ti kan von zoh  pei. Thlacamnak thu thawn pehpar aw in tlawng ka kai laiah kan tlawng ah elawknak tumpi a rak suak dah.  Cumi lai ih ka ṭongmi ka vun mang saal, “ Kai cun voksa khi a thaw zet ti ka thei ko na in ka ei ta lo ahcun ziangvek si a thawtnak ti ka thei ban lo” tin ka rak ṭong dah. Cumi cun ziangsi a sim duh tile thla a cam dah lo pa le nu cun thla cu cam ding a si  a ṭha ti cu an thei ko na in, thlacamnak ih hmual neizia le thilti theizia an tep (ei) ban lo ruangah zianghman  ah siar lo in thlacam an daithlang ṭheu. Thlacamnak ih hmual neizia le thilti theizia a tep ( ei) ngah zotu cun ziangvek caan khalah thlacamnak thawn an caan an hmang ringring. Kan Bible in thlacamnak ih hmual nei zia le thiltitheizia cu fiangten in sim, tampi sungin malte lawng kan von zoh ding.

Ni le Thlapi an cawl  (Joshua.10:12-14)

Ramkhat le ramkhat an do awk rero laiah tlangval ṭha Joshua in hitin thla a cam, “Maw Ninu, Gibeon khua tlunah ding law; Maw thlapa, Aijalon Horkuam tlunah cawl law ti ah a rak ti”.  Pathian in milai thu a ngai caan leitlun a sersiam thokin a rak um dah lomi  cu tlangval ṭha Joshua ih thlacamnak cu ngai lo in a um thei lo  tariai a si cu, a thlacamnak cu a sang ih a dil vekin Ni le Thlapi cu van tlunah an cawl tariai. Leitlun sersiam thokin a cang dah lomi le a cangtheilo ding tiang thil khal cu thlacamnak cun a cang ter thei a si cu.

Pathian ih thinlung a thlengter (Exo. 32:10-14)

Israel mi pawl in Pathian thin an heng ter. Curuangah Pathian cu a thin a heng tuk ih Moses hnenah i kham hlah aw, himi mi pawl hi ka siatsuah thluh hai ding tiah a ti. Cutikah Moses cun Bawipai hnenah a minung pawl hrangah thinlung kekkuai in thlaza a cam. Curuangah Bawipa cu a thin a ṭhum sal ih a sim ciami siatsuahnak cu a minung pawl parah thlengter lo in a um. Pathian in ka siatsuah thluh hai ding a timi a ṭongkam le a thinhennak cu thlacamnak in a daiter ih a thinlung a thleng ter thei a si. Pathian thinlung thlengter theitu le thinhennak damter theitu cu thlacamnak lawng a si.