Anthony Bawi Lian Thang
A cingmi nu in fate a nei saal (1Sam, 1:9:20)
Nikhat cu fate a nei thei lomi nunaunu cu thinlung kekkuai le beidong mitthli thawn Pathian hnenah thlaza a cam. Fate ka nei theilo ti thei na cingin Pathian hnenah, ‘Bawipa Fapa te in pe aw’ tiah a dil. Cui nunaunu fa nei theilo cu minung ruahnak ahcun a cang theilomi a rak si, asinan cui mitthli le thinlung takih a tlacamnak cu Pathian in a ngaisak ta riai. Cui nunaunu hnenah Pathian in a dil vekin fapa lawksawng malsawm a pek saal a si. Minung ruahnak ih cangtheilomi cu thlacamnak in a cang ter thei a si cu.
Mai in ti a dolh (1Siang 18:36-39)
Karmel tlang ah profet Elijah in Pathian hnenah thlaza a cam ih, van in mei a rung tlak ciamco, biakṭheng kiang ih sa le ti hmuahhmuah cu a dolh kang thluh. A kiang ih ummi mipi pawl cu an mang a bang tuk ih leilung ah an bok thluh, ziangahtile hivek thil cangmi hi ziangtik hmanah an rak hmu dah lo, cun a cangthei ding khal ah an rak zum lo. A si, minung ih ruahbanlo dinhmun tiang thlacamnak cun thil a ti thei a si.
Tui zaan ih thi dingmi pa a nung saal (2Siang. 20:1-6, Isaiah.38:1-10)
Siangpahrang Hezekiah cu a na ih a thi zikte. Culai fang ah Isaiah in a va feh ih Pathian in a sehherhmi hmuahhmuah tuah thluh seh, a nung lo ding a ti. Curuangah thi dingin tiimlaam aw tiah a va ti. Cui thu cu Siangpahrang Bawipa in a theih tikah Pathian hnenah a thinlung kekkuai in le mitthli thawn thla a cam, Isaiah cu inntual hman a thleng man lo, Bawipa in va kir saal aw, a thlacamnak le a mitthli ka hmu zo tui hnu kum hleinga a nung saal ding tin va sim saal aw tiah a ti. Pathian ṭongkam ih a suak zomi, na thi ding a ti mipa hman, thlacamnak cun a thinlung a thlengter saal ih a thi dingmi pa khal thi lo in a nungter sal a si. Aw …. aw, a va mak in a va sunglawi em thlacamnak cu…
0 comments:
Post a Comment