Lalruatcawk
1 Korin 2:6-9
Pathian hnen ihsin a rami fimnak cu thlarau lamih pitling cia pawl hrang lawngah fimnak a si. Cui fimnak cu leitlun uktu pawlih fimnak a si lo. Cui fimnak cu hi leitlun hmanih theihdahlomi fimnak thuthup sawn a si. Cui fimnak cu zo hmanih hmuhdahlomi le theihdahlomi, amah zumtu pawl hrang lawngih tumtahmi a si.Fimnak timi hi kan mai cahnak le ruahtheinak ruangih kan hlawhsuahmi a si lo ti Cathianhlim ih sim vekin fiangten kan hmu thei. Zirnak mal ruangah “kei ṭhahnemnak nei lo” tiah kan ti aw ṭheu. Sikhalsehla leilung tlun ih fimnak le thuruah thiamnak sangbik neitu Greek pawlih fimnak hman Pathian hrangah cun aatnak (aatthlak) tiah a ti. Zirnak lamah an rak fim zia cu tlawngkai tam deuh pawl cun kan thei thluh. Pathianthu zirnak, Sibawi zirnak, Philosophy zirnak lam khalah Greek ca tel lo in a famkim thei lo. Cutluk in minung lamah mifim hmaisa an rak si nan Pathian hrangah cun mifim an si cuang lo. Ziangahtile Pathian an duhdawt lo. Thuthangṭha an pom lo. “Sikhalsehla kan phuanmi “aat-thu” an timi Thuthangṭha hi hmang tahratin a zumtu pawl rundam dingah Pathian ih tuahmi a si” (1 Korin 1:20).
Curuangah theihnak le zirnak kan timi hi fimnak famkim a si lo. Tlawngkaimi le zirmi si hi fimlonak ti a si cuang lo, Pathian hmaika ahcun. Cui Pathian ih fimnak cu zohman ih rak hmuhdahlomi le theihdahlomi a si. Sikhalsehla amah a duhdawttu pawl hrangah a si. Cutivek thotho in fimnak kan timi ah misenpi ih kan ṭulmi fimnak timi le bulpak ih kan ṭulmi fimnak tin a um. Cui fimnak hrangah mi ta va ṭawm a theih lo. Mi hrangih a ṭhahnemmi fimnak kha kan bulpak hrangah cun a rak ṭhahnem lo tla a si ding. Curuangah fimnak timi a neitu Pathian zumtu kan sivek in a mai fimnak ringin zumnak thawn nitin ten ke kar uh si.
0 comments:
Post a Comment