Nitin Pathian thawn (Kan suangawnak sun Khrih)

Lalruatcawk
1Korin 1: 26-31

“Zokhal a uar awtu cun Bawipa ih tuahmi lawngah uar aw seh,”

Pathian in minung fimnak a hnong. Minung ih fimnak cu Pathian hrangah cun aatthlak a si. Fimnak ruangah zohman in Pathian an tong thei lo. Pathian ih  “fimnak” a si mi Khrih thawn lo cun zohman in Pathian an tong thei lo. Ziangahtile mifim pawl ningzakter dingah mi-aa timi pawl Pathian in a hril.

Paul in Korin khuaih zumtu pawl kha an sinak von zoh aw saal dingin a fial. Mifim thuneitu le hmaizahtlak cu malte lawng an si. Sikhalsehla an fimnak ruangah le hmaizahtlak an sinak ruangah Pathian in a khawhnak a si lo. Paul in hih Korin cakuat a ngan lai ih dunglamthu kan zoh a si le fimnak le thiamnak timi hi zumlotu pawl lakah an rak thupitter zet ti a fiang. Cuti a si ruangah Korin khuaih zumtu pawl khal an sinak an von zoh awk tikah an thin a nau. Sikhalsehla cui fimnak le sinak tivek pawl cu Pathian hmai ah aat-thlak a si tiah Paul in thazang a pe. A suang aw duhtu cun Bawipa ah suangaw sawn dingah a forh.

Vei tampi cu kan fimnak le thiamnak parah a thei ve lotu pawl rawtnak ah hmangin kan hngalsual pang ṭheu. Kan phun le hnam sinak tla mi va hmuhsuamnak ah kan hmang pang thei. Sum le pai lamah hlawhtlinnak kan donmi tla mi nautatnak ah kan hmang pang thei. Hnaṭuan ṭha kan ṭuanmi tla a ṭuan thei ve lo tu’i tlunah puarthaunak ah kan hmang pang thei. Pathian hmaiah cun uar ding tlak zianghman a um lo. Khrih lawng hi Pathian hnen ihsin a rami kan fimnak a si. Curuangah zozo khal Bawipai hnen lawngah suangaw ding kan si.