Nitin Pathian thawn (Thiang Thlarau, kan Fimnak)

Lalruatcawk

1Korin 2:10-12

Thlarau thianghlim cu Pathian ih thuthup phuangtu a si. Pathian ih tumtahmi khal cui Thlarau lawngin a thei. Curuangah Pathian ih fimnak hi minung ih thluak men in theih ban ding ci a si lo. Kan mah le kan mah khal kan theihthiam awklo caan vei tampi a um. Thlarau lawng in kan sinak ngaingai khal a thei. Pathian ih thinlung khal cui Thlarau lawng in a thei. Cui Thlarau cu Pathian hnenih sin kan co mi a si. Pathian ih laksawng in pekmi pawl khal cui Thlarau thawn lawng in kan thei thei.

Cui Thlarau cu Pathian ih humham, cahnak le thiltitheinak a si. Pathian in Lei le Van a sersiam hlanah Pathian thlarau cu van tlolak ah a leng. Sersiamnak ah Pathian ih humham cahnak a si ih nitin kan nunnak Vanthar le Leithar kan thlen hlan tiang leilungtlun pumpuluk kilkhawitu cu Pathian ih thlarau a si. Thukam Hlun Bible cu Hebrew ṭong ih nganmi a si. Cui Hebrew Bible ṭong in Thlarau timi an rel tikah tui kan ṭong ih “Thlipi” (English in Wind, Storm) timi thawn a ṭongfang siseh a tican siseh a bang aw. Curuangah Thlarau kan timi hi manbangza huham cahnak a si. Pathian ih umpinak khal cui Thlarau thawn lawng in kan co. Jesuh Khrih le Pa Pathian karlak khalah cui Thlarau thawn in an pethlaih aw aw. Thlacam daan ding kan theih lo lai caan khalah Thlarau cun Pathian hnenah in thlen sak.

Cuvek thotho in, Pathian ih fimnak, Jesuh Khrih sungih ta cu, Thlarau thawn lawng in kan thei. Cu mi a si, Zumtu pawl kan dang lamnak cu. Cui fimnak in petu Thlarau kan rinsan a si ahcun, mi lak khalah kan mualpho dah lo ding. Pathian khawkhan, Pathian thinlung, milai thinlung khal theithluhtu cu Thlarau lawng a si. Cucu tu ah Thiang Thlarau tiah kan ko.