Thla 12 an Thawhkehdaan (April)

Anthony Bawi Lian Thang
April timi ṭongfang hi Rome pawl in an sakmi Aprilis in a rami a si. Aprilis khal hi Latin ṭong ‘Aperire’ in rami a si ih, a sullam cu ‘ongaw’ (Open) tinak a si. Ahlan ahcun Aprilis timi hi Aphrilis tin an rak ko. Himi hi Latin ṭong ‘Aphradite’ in rami a si . Greek cun Aphro an ti, Aphrodite a tawizawng ih lakmi a si. Aphrodite ti cu Greek pawl ih an pathian a si ih duhdawtnak le mawinak famkim thawn a khatmi an khuazingnu kha a si.

Himi an pathian hi Rome pawlih pathian Venus thawn an bangawk ti an zum. April hin ni 29 lawng a rak nei, asinan Julius Caesar in ni khat a bet ih ni 30 a run neih nak a si, tuini tiang kan run hmang lan ta si cu. April ih sullam cu ongaw kan ti vekin himi thla ah hin pangpar mawimawi  an par caan a rak si. Hihi ṭong dangin kan sim a si le an sinak an lang ter, an onawk caan a rak si ve. An rak sak thiam na sa ka ti.